Ko sei uchidaro ?

Ko sei uchingoita weshure?                                      

Ko sei uchizvitarisira pasi?        

Ko nendava yei uchizvibata uyanga kudaro?    

Nyatsotsanangura mudikani.

Unorangarira here paya?     

Paya pandakakuwanikidza,                   

kukuwanikidza wozvibvisa mberi wozvikanda shure. 

Uchayeuka here musi uya?             

Musi uya wawaingoropodza nokumhiza-mhiza maoko,    

uchizvishoropodza pamwechete nokuzvinyomba.

Uchatondera here?                                                     

hwakumukwaku yawakazvipinza gore riya.   

Hezvo nhasi igumi nefarira matambudziko.

Pakanzi hewo mukana,batanawo nezvizvi zviri nane,

iwe tana kuramba,ichochi ndochangu chipo.  

Kudoti siyana naye kani idawo anokuda,  

gotsi papata,ndopakaperera wangu moyo.   

Chokwadi mabatiro aunozviita anodzoka ondidya moyo.

Nzwisisa mwana wokubereka,    

kuti upenyu idambakamwe.  

Nzwisisa weukama,   

kuti isu tiri vemberi,kwete weshure. 

Nzwisisa mudikani,     

kuti kwako kukosha kunopfuura sirivheri nendarama.

Usazvibata uyanga ndapota.

Na Robert T Nyamushosho

                                   

Waenda newangu moyo

Rwaiwe rufaro ndichikutarisa

Uri pedyo wangu moyo  waiteramira

Ndaigadzikana pasina chekumhanyira

Kana kusiwa ndaisakutyira

Kwauri  wangu moyo wakaperera.

Ndakuwana, ndakati ndaona mai wanondirera

Hezvo nhasi ndoyaura

Chaindida chondisemachose

Rudo rwuya rwaibhebha rwati tototo

Chokwadi rwedu rudo rwaive moto wemapepa

Rwakaririma pakutanga zvino dzave ngano

Ndaiziwei kuti  mufaro mwena

Wangu mufaro rwaiwe iwe

Waenda newangu moyo 

Wandisiya ndawe nherera

Ndisisina anorera 

Asi pazvose waenda newangu moyo

Ndangosara ndave demhe

Ndingawei pasina rwako rudo

Washinga kundisiya here rudo 

Zvawangu moyo watora ndorarama seiko 

Dzoka hwangu upenyu huwe netariro

Ndodii waenda newangu moyo 

Na Irvine Gwete

Chii chinonzi rudo?

Ko nhai chii chinonzi rudo?                                                                     

Kamhuka here kana kuti munhu,                                                             

mweya here kana kuti manzwira?

Hamawe-e nyatsondinyeurirai

Munoreva here kuti rudo kuda,                                                                                                              

kuda neakakuvenga. 

Kana kuti kusadzorera,

paunoitemwa ganyamuto inodzipura neganda.  

Nyatsotsanangurai kani vadikani.

Muneshuwa here kuti rudo,kutsungirira. 

Kutsungirira nepaanoshushwa mwana wevanhu. 

Kuramba akagonya,   

nepaanochiunzirwa  chati kuurayisa vana vevanhu , 

kuri kugarira vana.  

Nyatsobudai pachena kani vakuruwe-e. 

Mareva here kuti rudo kuva nemurefu moyo, 

Hezvo mutema zvose nomuchena hapana kana musiyano.   

moyo wakareba zvisingagumi.  

Mati imi kuva nehanya,   

hanya nedzisingasaruri ani zvake.   

Nyatsodonongorai kani, ko kudimikira ndekwei?  

Mati imi rudo kuda, kuda neasingakudi. 

Zvoreva kuti ndopa rwangu rudo neanoruputsira pasi,   

kurubvarura-bvarura kuita kanyama. 

Ndizvo here kuti ndoda neanotamba newangu moyo.

Aiwa kani ko kurova makaviga mupini ndokunei?  

Hezvo motokohomekedza nhasi moti,   

rudo kuda neakakurasisa kukusiya wega,  

ndiye sone-e neivo vezviuno zvego. 

Napamusana porudo nhasi monditi gamuchira,  

gamuchira namaviri kunyamwe angove mapfupa ozvifambira.

Nyatsojekesai kani vakuruwe-e,   

hamuoni here kuti ndichiri chadzimira? 

NaRobert.T.Nyamushosho                             

.

                                                                                                                                                                                                                                                                                                                                                                                                                                         

                                                                                                                                                                                                                                                                               

                                                                                                                                                                                                                                         

                                                                                                                                                

                                                                                                                                                                                                                                                                           

                                         

                                       

                                    

Mupambemoyo

Ndikanyatso-kuti udyu-u neangu maziso,
chokwadi ndinochishaya kuchishaya chaiko
chandakada pauri.

Ndikanyatsozvigaya ndopedzisira ndodzungudza musoro.
Dzangu pfungwa dzinoramba, kuramba chaiko
kuti ndiwe nyakupingudza wangu moyo.

Kuzoti ndikazviyeuka,haiwa
zvinondiremera kuzvigamuchira,kuzvigashira
kuti ndava muhusungwa mehwako hutongi
hezvo kana zita kudoriyeuka handichagona.
Kuzoti nzira yovokwangu vokubereka
haiwa-a ikamwe pagore hembe yenherera.
Chokwadi nyatsondinyeurira kani mwene wewangu moyo,
mbavha yakarozva zvose hezvo ndangove demhe.

Kudoti ndiwanewo iro simba rokusvosva itwoka
tunotemwa dzinobuda ropa
wangu moyo unoramba.
Pedzezvo ndongogonyera panewe,
mupambe wewangu moyo.

Handaitarsira kuti nditsidze pamberi penyika yese asi
zvakakona
hezvo mangani atatsenga ndingori muhwako hutongi?
Chaisava changu chitarisiro,
kuti tigoita gumi refarira
ivo vari vana.

Chaisava changu chishuwo
kuvaka musha unozengurisa kudai.
Chete zvaizoenda nepiko
iwe wangu wainge wapamba kare.

Na Robert T.Nyamushosho